ఇరంగంటి వెంకట శేష అచ్యుతవల్లి

ఇరంగంటి వెంకట శేష అచ్యుతవల్లి 1943 మే 1 తేదీన పశ్చిమ గోదావరి జిల్లా, దొంతవరంలో జన్మించింది. తల్లి అంజమ్మ, తండ్రి వెంకటగోవిందాచార్యులు. పుట్టిన ఊరిలో పాఠశాల లేని కారణంగా ఈమె విద్యాభ్యాసం కాకినాడలో మాతామహుల ఇంట్లో కొనసాగింది. పిఠాపురం రాజా హైస్కూల్లోను, కాకినాడ కళాశాలలోను విద్యనభ్యసించింది. ఆంధ్ర విశ్వవిద్యాలయం నుండి బి.ఎ. పట్టాపొందింది. దక్షిణభారత హిందీ ప్రచారసభ నిర్వహించే పరీక్షలలో విశారద ఉత్తీర్ణత పొందింది. సంస్కృతంలో దక్షిణ భాషా ప్రచారం వారి సమర్థ విశారద పాస్ (బి.ఎ.) అయ్యింది. కర్ణాటక గాత్ర సంగీతంలో డిప్లమో చేసింది. ఆకాశవాణిలో 1960-62 ప్రాంతాలలో బి.గ్రేడు కళాకారిణిగా లలితగీతాలు పాడింది. ఈమెకు 1964లో తన 21 యేట వివాహం జరిగింది. భర్త ఉద్యోగరీత్యా కర్ణాటక, ఆంధ్ర రాష్ట్రాలలో నివసించి చివరకు పెంటపాడులో స్థిరపడింది. 2010లో మరణించింది.
ఈమె 8 కథాసంకలనాలు, 18 నవలలు, 400లకుపైగా కథలు వ్రాసి రచయిత్రిగా వాసికెక్కింది. మొదటి రచన ఆంధ్రప్రభ సచిత్రవారపత్రిక ప్రమదావనం శీర్షికలో ప్రచురింపబడిన ఇంటి శుభ్రత అనే వ్యాసం. 1958లో జగతి పత్రికలో తొలికథ వంచిత ప్రచురింపబడింది. 1961లో మొట్టమొదటి నవల పుట్టిల్లు ప్రచురితమైనది. వివాహం కాకముందు కె.వి.ఎస్.ఆచ్యుతవల్లి పేరుతోను, రాఘవేంద్ర కలంపేరుతోను రచనలు చేసింది. ఈమె రచనలు పలు భాషలలో తర్జుమా అయ్యాయి. ఇదెక్కడి న్యాయం నవల తెలుగుతో కలిపి 4 భాషలలో సినిమాగా తీయబడింది. జయశ్రీ మాసపత్రికలో ఆజ్ ఔర్ కల్ అనే శీర్షికను, రచన మాసపత్రికలో బాతోఁ మే ఖూనీ అనే శీర్షికను నిర్వహించింది. ఇవి కాకుండా ఎన్నో వ్యాసాలను వ్రాసింది. రేడియో ప్రసంగాలు చేసింది.

———–