కొత్త భావయ్య చౌదరి

కొత్త భావయ్య చౌదరి ఒక చారిత్రక పరిశోధకుడు. తీరాంధ్ర దేశము, గుంటూరు మండలము, తెనాలి సమీపమున నున్న సంగం జాగర్లమూడి అను గ్రామంలో జూన్ 2, 1897లో జన్మించాడు. విజ్ఞాన చంద్రికా మండలి పరీక్షలో కృతార్ధులై శ్రీ కందుకూరి వీరేశలింగం పంతులు నుండి యోగ్యతా పత్రం పొందాడు. స్వయం కృషితో పరిశోధనా పటిమను, పాండిత్యాన్ని సంపాదించాడు. స్వగ్రామమైన సంగం జాగర్లమూడి సర్పంచ్‌గా గ్రామాభ్యుదయానికి పాటు పడ్డాడు. పలు పాఠశాలలకు, కళాశాలలకు భూరి విరాళాలిచ్చాడు. ఆంధ్ర, కర్ణాట, తమిళ దేశాలలో దొరికిన శాసనాలు, సంస్కృతాంధ్ర కావ్యాలు, తాళపత్ర గ్రంథాలు, కైఫీయతులు తదితర మూలాలు పరిశోధించి, ఎన్నో వ్యయప్రయాసలను లెక్కించక నిరంతర దీక్షతో 12 సంవత్సరాలు కృషి చేసి కమ్మవారి చరిత్రం అను మూడు సంపుటాలు గ్రంథాన్ని రాశాడు. 1954లో మూడు సంపుటాలలోని సమాచారం క్లుప్తంగా ఆంగ్లంలోనికి అనువదించబడినది. మద్రాసులో మకాముపెట్టి అచటి ప్రాచ్య లిఖిత పుస్తకాలయం, విశ్వవిద్యాలయం, శాసన పరిశోధన కార్యాలయాలలో విషయ సేకరణ చేశాడు. సంస్థానాధీశులను, జమీందారులను, పండితులను మున్నగు వారిని సంప్రదించి, ఎన్నో ఉపేక్షలను లెక్కించక తలచిన కార్యం సాధించాడు. భావయ్య విరచితమైన పెక్కు పుస్తకములలో కొన్ని: దేవరహస్యాలు, కాశ్మీర నేపాల దేశ చరిత్రలు, పశ్చిమ చాళుక్య చరిత్ర, వేంగీ చాళుక్య చరిత్ర, సగరపట్టాభిషేకం, కాకతీయ రాజన్య చరిత్ర, ఆంధ్ర రాజులు, గుంటూరు మండల ప్రాచీన చరిత్ర, శాయపనేనివారి చరిత్ర, పరశురామ నాటకము, వినోద కథలు, ప్రభోధకుసుమావళి.

———–