ఆచార్య ఆత్రేయ
ఎవరు దొంగ ..నాటకం

పాత్రల పరిచయం :
దొంగ , చౌదరి ,కానిస్టేబుల్ , సబ్ ఇనస్పెక్టరు , వార్డెను , డి .ఎస్ .ఓ , మునుసబు , డాక్టరు , పత్రికా విలేకరి , యిద్దరు ఖైదీలు , కుర్రవాడు .

తెర ఎత్తకుండానే నాటకం మొదలవుతుంది . మొట్ట మొదట నాటకం మొదలు పెడుతున్నారని ప్రేక్షకులకు తెలియడానికి – మైక్ లో ఫలానా వారు ఫలానా వారు రచించిన “ ఎవరు దొంగ “ అన్న ఏకాంకిక ప్రదర్శిస్తారు అని ప్రకటన చేయబడుతుంది .
తరువాత బెల్ అయిన వెంటనే పోలీస్ విజిల్స్ నాలుగైదు వరుసన గోలగా వూదబడతాయి . నలుగురైదుగురు బూట్ల కాళ్లతో పరుగెత్తుతూ వున్న ధ్వని రాను రాను దగ్గరవుతుంది . కాస్సేపటిలో ఒకడు తెర ముందు నుంచి వాయు వేగంతో పరుగెత్తు కొచ్చి స్టేజి దిగి ప్రేక్షకుల్లోకి వెళ్లి కూచుంటాడు . ఆ తరువాత ఒకతను పరుగెత్తు కొచ్చి ఆగి అటు ఇటు చూచి , స్టేజి దిగి , ప్రేక్షకుల దగ్గర కొచ్చి ప్రేక్షకులనంతా కలియ చూచి , ముందు వరసలో వున్నా వాళ్లను చూచి —–
అతడు : అరే , ఇలా ఒకతను పరుగెత్తు కొచ్చాడు . చూచారండి మీరు ? ఇప్పుడే వచ్చాడు , అరే ! ఇంత లో ఎలా వెళ్లాడు ? దొంగ వెధవ , మీరెవరూ చూడలేదాండి ? వాడు దొంగండీ . మనమంతా ఇక్కడున్నామని తెలిసి ఎలా వచ్చాడో వచ్చాడు హాస్టల్లోకి . మెల్లగా అటు ఇటు చూచి స్టోర్సు తాళం పగల గొట్టి లోపల దూరాడు సార్ . రాస్కల్ . నేను కనబడేటప్పటి కల్లా పరారయ్యాడు . కాస్త చూడండయ్యా ! చూడండీ .
(ప్రేక్షకులలోంచి ఒక కుర్రాడు లేచి )
కుర్రాడు : అరే ! హాస్టల్లో దొంగ దూరాడా ? ఏం పట్టుకెళ్ళాడో ! ఇప్పుడే ఇలా ఎవరో పరుగెత్తుకొచ్చారోయ్ .
2 వ వాడు : (తమిళంలో ) ఆమా ఆమా , నాను పాతేన్ ఇప్దిదా వందాన్ .
3 వ వాడు : (ఇంగ్లీషులో ) జస్టు ఐ సా యే ఫాలో రన్నింగ్ దిస్ వే .
4 వ వాడు : ఏరా , ఫ్యాన్సీ డ్రస్ కాంపిటీషన్ కాదు గదా కొంపదీసి ?
1 వ వాడు : అయితే వార్డెన్ తో చెప్పవా ?
అతను : వార్డెన్ ఎక్కడ ?
1 వ వాడు : చూడు , బ్రదర్ , చూడు . ఆ మేకప్ రూంలో ఉంటాడేమో , పద , పద .
ఒకటవవాడు , అతడు స్టేజీ మీదకు పరుగెత్తుతారు . ఇంతలో వార్డెన్ వస్తూ –
వార్డె : ఐ సే , ఏమిటీ గోల ! నాటకం జరగనీకుండా . వాట్ ఈజ్ రాంగ్ విత్ యు !
అతను : హాస్టల్ స్టోర్సు లో దొంగ పడ్డాడండి .
వార్డె : దొంగ !
1 వ వాడు : అవునటండి .
వార్డె : తాళం పగల గొట్టాడా ?
అతను : అవునండీ !
వార్డె : మనిషిని చూశావా ?
అతను : ఎవడో బెగ్గర్ వెధవండి . రేగ్స్ (చింకి పాతలు ) లో ఉన్నాడు .
వార్డె : వాచ్ మెన్ అంతా ఏం చేస్తున్నారోయ్ ?
1 వ వాడు : ఇక్కడ నాటకం చూడడానికొచ్చేశారండి .
వార్డె : నాన్ సెన్స్ . ఆ వెధవలకూ వైజ్ఞానిక వారోత్సవాలు కావలసి వచ్చినాయ్ ? కమాన్ కమాన్ . వెళ్లి అక్కడ ఏం జరిగిందో చూద్దాం రండి .(పోబోతూ , వెనక్కు తిరిగి ) మహాశయులారా ! యీ అవాంతరం కలిగినందుకు విచారిస్తున్నాం . తొందరలో ఇంజనీరింగు కాలేజీ వారి నాటకం మొదలెడతాం . మీరు కాస్త ప్రశాంతంగా వుండాలి . ఇప్పుడే వస్తా .(అని పోబోతుండగా ఎదురుగా పోలీస్ సబినస్పెక్టర్ , కానిస్టేబుల్ వస్తారు .)
వార్డె : పోలీస్ !!!!
సబినస్పెక్టర్ : గుడ్ మార్నింగ్ సార్ .
వార్డె : గుడ్ మార్నింగ్ , ఏం కావాలండీ ?
స .ఇ : ఏం లేదండీ , ఈ హాస్టల్ వార్డెన్ గారేవరండీ ?
వార్డె : నేనే , ఎందుకండీ ! దొంగ దొరికాడా ?
స.ఇ : దొంగ ?
వార్డె : ఆ దొంగండి . హాస్టల్ స్టోర్సు లో తాళం పగలు గొట్టి దూరాడు . మనిషి కనపడేటప్పటీ కల్లా పత్తా లేకుండా పోయాడు )
(ఇంతలో లోపల నుంచి ఒక కుర్రాడు పరుగెత్తు కొస్తూ )
కుర్ర : సార్ ! సార్ !
వార్డె : ఏం ?
కుర్ర : మనం నాటకానికి తెచ్చిన డ్రెస్సుల మూటంతా కనపడ్డం లేదండీ .
వార్డె : వెదకండోయ్ ? ఎక్కడో వుంటుంది . అన్నీ ఇప్పుడే వస్తాయి మీకు .
కుర్ర : వెదికామండీ ! ఎక్కడా లేదు . ఇప్పుడే తెచ్చి ఆ బైట డ్రెస్సింగ్ రూం లో పెట్టాం ; ఓ మినిట్ తరువాత చూస్తే లేదు సార్ !
వార్డె : చూచారాండీ ; ఇదీ ఆ దొంగే కొట్టేసుంటాడు ; సందేహం లేదు.
స .ఇ : దొంగ ఎలా పారిపోయాడు ఎవరన్న చూచారా ?
అతను : ఇప్పుడే ఇలా వెళ్ళాడండీ , నేను వాణ్ణి తరుము కొచ్చాను , ఇలా ఆడియన్స్ లో దూరి వెళ్లాడు .
స .ఇ : అరె ! ఎలా ఉంటాడో గుర్తుందా మీకు ?
అతను : కాస్త దూరం నుంచి టార్చి వేసి చూశానండి ; మనిషి ముఖం కనబడలా ! ఒక ముష్టి వాడిలా ఉంటాడు . చిరిగిన చొక్కా , చింపిరితల , అయిదడుగుల రెండంగుళాలు లేక మూడంగుళాలు ఉంటాడు .
స .ఇ : లావుగా ఉంటాడా , బక్కగా ఉంటాడా ?
అతను : మీడియం (మధ్యస్థంగా ) గా ఉంటాడండి .
స .ఇ : (కానిస్టేబుల్ తో ) ఏయ్ ! ఈ గుంపులో ఎక్కడన్నా ఉన్నాడేమో వెతుకు .
(కాని స్టేబుల్ స్టేజి దిగి ఆడియన్సు లోంచి మెల్లగా జారుకుంటాడు .)
స .ఇ : వాడు వెతికి పట్టుకొస్తాడు లెండి ! మీరు కాస్త దయ చేసి స్టేషన్ దాకా రావాలి .
వార్డె : దొంగ దొరకందే !
స .ఇ : దొంగ వాడే దొరుకుతాడు లెండి .
వార్డె : రేపు మార్నింగు రాగూడడూ ? నాకీ ఫంక్షనుంది .
స .ఇ : లేదండీ ! వెంటనే రావాలి .
వార్డె : కాస్త కూచోండి వెళ్దాం ? ఇప్పుడు ఇంజనీరింగ్ కాలేజీ వాళ్ల నాటకం ఉంది . చూచి పోదాం . లాస్ట్ యియర్ (నిరుడు ) ఫస్టు ప్రయిజ్ వచ్చింది వాళ్ళకే . ఈ సారి కూడా మంచి నాటకమే ఆడతారు ; చూచి వెళ్దాం ; ఏమంటారు ?
స .ఇ : నో , ఎక్స్ క్యూజ్ మి ప్లీజ్ . క్షమించండి . మాకు నాటకాలు చూచే తీరికలేదు .
వార్డె : పోనీ రేపు మార్నింగు వచ్చి రిపోర్టు యివ్వకూడందండీ ?
స .ఇ : రిపోర్టు యిది వరకే యిచ్చేశారు . ఇక మీరివ్వాలిసింది సంజాయిషీనే !
వార్డె : ఏమిటీ ?
స .ఇ : యు ఆర్ అండర్ అరెస్టు (మిమ్మల్ని అరెస్టు చేశాం ).
వార్డె : ఏమిటీ ?
స .ఇ : అరెస్ట్ ! మై సెల్ఫ్ ! వాట్ ?(నన్నా ఏమిటి ).
స .ఇ : యు ఆర్ అండర్ అరెస్టు .
వార్డె : ఓ …… …… …
స .ఇ : రాండి సార్ , రాండి :
(ఇంతలో ఒక కానిస్టేబుల్ గబా గబా వస్తాడు .
సబిన్ స్పెక్టరు కి శాల్యూట్ కొట్టి …..)
కాని : సార్ !
స .ఇ : ఏం రా ?

సేకరణ : ఎవరు దొంగ ? నాటకం

———–